Российский
Императорский Дом

Официальный сайт
Династии Романовых

Одноклассники
ВКонтакте

БЛАГОДАРЕНИЕ о получении прошения и о всяком благодеянии Божии

БЛАГОДАРЕНИЕ о получении прошения

и о всяком благодеянии Божии

(Последование молебных пений. – М., 1820. – Л. 50-61об.; Внесенные изменения: поминовение Святейшего Патриарха Московского и всея Руси вместо Святейшего Правительствующего Синода и замена имен Главы и Членов Царственного Дома в соответствии с его нынешним состоянием)

 

 

Ведомо буди всякому правоверному христианину, яко имже образом должни есмы и вся потребная нам, душевная же и телесная, тайне в своей клети, и яве в церкви, Бога яко всех благих Подателя просити, сице о получении своего прошения, и о всяком Божии благодеянии нам или обще всем, или едине единственному от нас бывающем, должни есмы всяко и особне в себе самых, и в клетех своих всегда, и народне яве в церкв, Богу яко Благодетелю нашему благодарение сотворити: да не како неблагодарни о благодеянии Его еже к нам явившеся, якоже он ленивый и неблагодарный раб, талант благодеяния Господа своего в земли сокрывый, постраждем, и не точию полученнаго благодеяния лютее отщетимся, но и вечныя казни повинни обрящемся.

Темже, о иерее! Вам достоит люди Божия, вам врученныя, яже Богу суть благоугодная учити творити, о ваших бо рук кровь погибели их душ люте взыщется.

Получив убо кто от Бога благодеяние кое, абие должен есть прибегнути к церкви, и иереа просити, еже благодарение Богу от него воздати сим образом.

Аще на Божественней Литургии сие бывает: по БЛАГОСЛОВЕННО ЦАРСТВО: ектениа обычная, к нимже прилагаются благодарственная.

По Входе же тропари последующыя и по дневном прокимне благодарственный, и по Апостоле дневном, Апостол Благодарению: такожде и по дневном Евангелии чтется благодарению.

По Евангелии же и по обычных ектениах прилагаются благодарению.

Причастен дневи, благодарению же сей: Воспою Господеви, благодеявшему мне, и пою Имени Господа Вышняго. Аллилуиа.

По заамвонной же молитве чтет иерей молитву благодарения, и поется СЛАВОСЛОВИЕ ВЕЛИКОЕ посреди церкве, якоже и на утрени. Или аще изволят, вместо СЛАВОСЛОВИЯ поют: ТЕБЕ БОГА ХВАЛИМ:

 

Аще же не в Литургии, но по утрени, или по вечерни сие приключится совершити, сице бывает:

 

Иерей оболчен в епитрахиль и фелонь, став пред Святою Трапезою, и сию крестообразно покадив, творит начало сие:

Слава Святей, и Единосущней, и Неразделимей Троице, всегда, ныне, и присно, и во веки веков.

 

Лик: Аминь

И чтут: ТРИСВЯТОЕ: ОТЧЕ НАШ: ГОСПОДИ ПОМИЛУЙ (12). СЛАВА: И НЫНЕ: ПРИИДИТЕ ПОКЛОНИМСЯ: трижды.

 

И Псалом 117:

Исповедайтеся Господеви, яко благ, яко в век милость Его. Да речет убо дом Израилев, яко благ, яко в век милость Его. Да речет убо дом Ааронь, яко благ, яко в век милость Его. Да рекут убо вси боящиися Господа, яко благ, яко в век милость Его. От скорби призвах Господа, и услыша мя в пространство. Господь мне помощник, и не убоюся, что сотворит мне человек. Господь мне помощник, и аз воззрю на враги моя. Благо есть надеятися на Господа, нежели надеятися на человека. Благо есть уповати на Господа, нежели уповати на князи. Вси языцы обыдоша мя, и Именем Господним противляхся им. Обышедше обыдоша мя, и Именем Господним противляхся им. Обыдоша мя, яко пчелы сот, и разгорешася яко огнь в тернии, и Именем Господним противляхся им. Отриновен превратихся пасти, и Господь прият мя. Крепость моя и пение мое Господь, и бысть мне во спасение. Глас радости и спасения в селениих праведных. Десница Господня сотвори силу: Десница Господня вознесе мя: Десница Господня сотвори силу. Не умру, но жив буду и повем дела Господня. Наказуя наказа мя Господь, смерти же не предаде мя. Отверзите мне врата правды, вшед в ня исповемся Господеви. Сия врата Господня, праведнии внидут в ня. Исповемся Тебе, яко услышал мя еси, и был еси мне во спасение. Камень, егоже небрегоша зиждущии, сей бысть во главу угла. От Господа бысть сей, и есть дивен во очесех наших. Сей день, егоже сотвори Господь, возрадуемся и возвеселимся в онь. О, Господи, спаси же, о, Господи, поспеши же. Благословен грядый во Имя Господне: благословихом вы из Дому Господня. Бог Господь и явися нам, составите праздник во учащающих, до рог олтаревых. Бог мой еси Ты, и исповемся Тебе: Бог мой еси Ты, и вознесу Тя. Исповемся Тебе, яко услышал мя еси, и был еси мне во спасение. Исповедайтеся Господеви яко благ, яко в век милость Его.

 

Слава, и ныне: Аллилуиа, Аллилуиа, Аллилуиа, слава Тебе, Боже (трижды).

 

Диакон же глаголет ектению сию:

 

Диакон: Миром Господу помолимся.

Лик: Господи, помилуй.

 

Диакон: О свышнем мире, и о спасении душ наших, Господу помолимся.

Лик: Господи, помилуй.

 

Диакон: О мире всего мира, благостоянии Святых Божиих Церквей и соединении всех Господу помолимся.

Лик: Господи, помилуй.

 

Диакон: О святем храме сем (о святей обители сей) и с верою, благоговением и страхом Божиим входящих в онь (в ню) Господу помолимся.

Лик: Господи, помилуй.

 

Диакон: О Великом Господине и отце нашем СВЯТЕЙШЕМ ПАТРИАРХЕ КИРИЛЛЕ, и о Господине нашем (имярек), честнем пресвитерстве, во Христе диаконстве, о всем причте и людех Господу помолимся.

Лик: Господи, помилуй.

 

Диакон: О Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ Господу помолимся.

Лик: Господи, помилуй.

 

Диакон: О Наследнике ЕЯ Благоверном Государе Цесаревиче и ВЕЛИКОМ КНЯЗЕ ГЕОРГИИ МИХАЙЛОВИЧЕ, и о супруге его Благоверной КНЯГИНЕ ВИКТОРИИ РОМАНОВНЕ, и о сыне их Благоверном КНЯЗЕ АЛЕКСАНДРЕ ГЕОРГИЕВИЧЕ Господу помолимся.

Лик: Господи, помилуй.

 

Диакон: О Богохранимей стране нашей, Властех и Воинстве ея Господу помолимся.

Лик: Господи, помилуй.

 

Диакон: О пособити и покорити под нозе их всякаго врага и супостата Господу помолимся.

Лик: Господи, помилуй.

 

Диакон: О Граде сем, всяком граде, стране и верою живущих в них Господу помолимся.

Лик: Господи, помилуй.

 

Диакон: О благорастворении воздухов, о изобилии плодов земных и временех мирных Господу помолимся.

Лик: Господи, помилуй.

 

Диакон: О плавающих, путешествующих, недугующих, страждущих, плененных, и о спасении их Господу помолимся.

Лик: Господи, помилуй.

 

Диакон: О еже милостивно нынешнее благодарение и мольбу нас недостойных рабов Своих в Пренебесный Свой жертвенник прияти, и благоутробно помиловати нас, Господу помолимся.

Лик: Господи, помилуй.

 

Диакон: О еже не возгнушатися благодарением нас непотребных рабов Своих, еже о приятых от Него благодеяниих, во смиренном сердце приносим: но яко кадило благовонное, и всесожжение тучное благоприятное Ему да будет, Господу помолимся.

Лик: Господи, помилуй.

 

Диакон: О еже и ныне послушати глас моления нас недостойных рабов Своих, и доброе намерение и желание верных Своих во благое всегда исполнити, и всегда яко Щедр благодеяти нам и Церкви Своей Святей и всякому верному Своему рабу прошения даровати, Господу помолимся.

Лик: Господи, помилуй.

 

Диакон: О еже избавити Церковь Свою Святую, и рабу Свою Благочестивейшую Благоверную Государыню ВЕЛИКУЮ КНЯГИНЮ МАРИЮ ВЛАДИМИРОВНУ, и весь Царственный Дом, и всех нас от всякия скорби, беды, гнева, и нужды, и от всех врагов видимых и невидимых: здравием же, долгоденствием, и миром, и Ангел Своих ополчением верных Своих всегда оградити, Господу помолимся.

Лик: Господи, помилуй.

 

Диакон: Заступи, спаси, помилуй и сохрани нас, Боже, Твоею благодатию.

Лик: Господи, помилуй.

 

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

 

Иерей же возглашает:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

 

Лик: Аминь.

 

Посем поют: Бог Господь, и явися нам: на глас 1.

 

И тропари сия: глас 4:

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Слава, глас 3: Твоих благодеяний и даров туне яко раби непотребнии сподоблшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже прещедрый.

И ныне, глас 2: Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире ВЕЛИКУЮ КНЯГИНЮ и град Твой, молитвами Богородицы, и спаси ны.

 

Диакон: Вонмем.

 

Иерей: Мир всем.

 

Чтец: И духови твоему.

 

Диакон: Премудрость, вонмем.

 

Чтец: Прокимен, глас 4: Воспою Господеви благодеявшему мне, и пою Имени Господа Вышняго.

 

Стих: Возрадуется сердце мое о спасении Твоем

 

Диакон: Премудрость.

 

Чтец: К Тимофею святаго Апостола Павла чтение.

 

Диакон: Вонмем.

 

Посем чтец чтет Апостол: Ко Ефесеям Послания Святаго Апостола Павла чтение (Зачало 229):

 

Братие, яко чада света ходите: Плод бо духовный есть во всякой благостыни, и правде, и истине. Искушающе, что есть благоугодно Богови. И не приобщайтеся к делом неплодным тмы, паче же и обличайте. Бываемое бо оттай от них, срамно есть и глаголати. Вся же обличаемая от света, являются: все бо являемое свет есть. Сего ради глаголет: востани, спяй, и воскресни от мертвых, и осветит тя Христос. Блюдите убо, како опасно ходите, не якоже немудри, но якоже премудри: Искупующе время, яко дние лукави суть. Сего ради не бывайте несмысленни, но разумевающе, ято есть воля Божия: И не упивайтеся вином, в немже есть блуд: но паче исполняйтеся духом, глаголюще себе во псалмех и пениих, и песнех духовных, воспевающе и поюще в сердцах ваших Господеви, благодаряще всегда о всех, о Имени Господа нашего Иисуса Христа, Богу и Отцу, повинующеся друг другу в страсе Божии.

 

Во Дни Рождения Главы Российского Императорского Дома и Членов Ея Августейшей Семьи (1 Тимофею., зач. 282):

 

Чадо Тимофее, молю прежде всех творити молитвы, моления, прошения, благодарения за вся человеки: за Царя, и за вся иже во власти суть: да тихое и безмолвное житие поживем во всяком благочестии и чистоте. Сие бо добро и приятно пред Спасителем нашим Богом, Иже всем человеком хощет спастися и в разум истины приити. Един бо есть Бог, и един ходатай Бога и человеков, Человек Христос Иисус, Давый Себе избавление за всех: Емуже честь и слава во веки веков, аминь.

 

Во дни викториальные, яко о Полтавской баталии и прочыя (2 Коринфяном, зачало 172):

 

Братие, Богу благодарение, всегда победители нас творящему о Христе Иисусе, и воню разума его являющу нами во всяком месте. Яко Христово благоухание есмы Богови в спасаемых и в погибающих. Овем убо воня смертная, в смерть: овем же воня животная в живот. И к сим кто доволен; Царю же веков, Нетленному, Невидимому, Единому Премудрому Богу, честь и слава во веки веков, Аминь.

 

Иерей: Мир ти.

 

Чтец: И духови твоему.

 

Диакон: Премудрость, прости, услышим Святаго Евангелия.

 

Иерей: Мир всем.

 

Лик: И духови твоему.

 

Иерей: От Луки Святаго Евангелия чтение.

 

Лик: Слава Тебе, Господи, слава Тебе.

 

Диакон: Вонмем.

 

Иерей чтет Евангелие от Луки, зачало 85:

 

Во время оно, входящу Иисусови в некую весь, сретоша Его десять прокаженных мужей, иже сташа издалеча. И тии вознесоша глас, глаголюще: Иисусе Наставниче, помилуй ны. И видев, рече им: шедшее, покажитеся священником, и бысть идущым им, очистишася. Един же от них, видев, яко исцеле, возвратися со гласом велиим славя Бога: И паде ниц при ногу Его, хвалу Ему воздая: и той бе самарянин. Отвещав же Иисус рече: не десять ли очистишася, да девять где; Како не обретошася возвращшеся дати славу Богу, токмо иноплеменник сей; и рече ему: восстав иди, вера твоя спасе тя.

 

Лик: Слава Тебе, Господи, слава Тебе.

 

По Евангелии же абие диакон глаголет ектению сию:

 

Диакон: Помилуй нас, Боже, по велицей милости Твоей, молимся Ти, услыши и помилуй.

Лик: Господи, помилуй (трижды).

 

Диакон: Еще молимся о Великом Господине и отце нашем СВЯТЕЙШЕМ ПАТРИАРХЕ КИРИЛЛЕ, и о Господине нашем (имярек), и всей во Христе братии нашей.

Лик: Господи, помилуй (трижды).

 

Диакон: Еще молимся о Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ.

Лик: Господи, помилуй (трижды).

 

Диакон: Еще молимся о Наследнике ЕЯ Благоверном Государе Цесаревиче и ВЕЛИКОМ КНЯЗЕ ГЕОРГИИ МИХАЙЛОВИЧЕ, и о супруге его Благоверной КНЯГИНЕ ВИКТОРИИ РОМАНОВНЕ, и о сыне их Благоверном КНЯЗЕ АЛЕКСАНДРЕ ГЕОРГИЕВИЧЕ.

Лик: Господи, помилуй (трижды).

 

Диакон: Еще молимся о Богохранимей стране нашей, Властех и Воинстве ея, да тихое и безмолвное житие поживем во всяком благочестии и чистоте.

Лик: Господи, помилуй (трижды).

 

Диакон: Благодаряще со страхом и трепетом, яко раби непотребнии Твоему благоутробию Спасе, и Владыко наш Господи, о Твоих благодеяниих, яже излиял еси изобильно на рабех Твоих, и припадаем, и славословие Тебе, яко Богу приносим, и умиленно вопием: избави от всех бед рабы Твоя, и всегда яко милостив исполни во благих желание всех нас, прилежно молимся Ти, услыши и помилуй.

Лик: Господи, помилуй (трижды).

 

Диакон: Якоже ныне милостивно услышал еси молитвы рабов Твоих, Господи, и явил еси на них благоутробие человеколюбия Твоего, сице и в предняя не презирая, исполни во славу Твою вся благая хотения верных Твоих, и яви всем нам богатую милость Твою, вся нам согрешения презирая: молимся Ти, услыши и помилуй.

Лик: Господи, помилуй (трижды).

 

Диакон: Благоприятно яко кадило благовонное, и яко тучная всесожжения да будет, Всеблагий Владыко, благодарение сие наше пред Величеством славы Твоея, и низпосли всегда, яко щедр, рабом Твоим богатыя милости, и щедроты Твоя, и от всех сопротивлений видимых и невидимых врагов Церковь Твою Святую, обитель сию и град сей избави, рабе же Твоей Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ, и всему Царственному Дому, и людем Твоим безгрешное со здравием долгоденствие, и во всех добродетелех преспеяние даруй, молим Ти ся, Всещедрый Царю, милостивно услыши и скоро помилуй.

Лик: Господи, помилуй (трижды).

 

Иерей же возглашает:

 

Услыши ны, Боже Спасителю наш, упование всех концев земли и сущих в море далече, и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

 

Лик: Аминь.

 

И поклонься трижды пред Святою Трапезою, рекшу диакону:

 

Господу помолимся.

 

Лик: Господи, помилуй.

 

Иерей же со умилением чтет молитву сию велегласно:

 

Господи Иисусе Христе Боже наш, Боже всякаго милосердия и щедрот, Его же милость безмерна, и человеколюбия неизследимая пучина: ко Твоему величеству припадающе, со страхом и трепетом яко раби недостойнии благодарение Твоему благоутробию о Твоих благодеяниих на рабе Твоей Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ, и всем Царственном Доме, и на рабех Твоих (имена) бывших, ныне смиренно приносяще, яко Господа, Владыку и Благодетеля славим, хвалим, поем и величаем, и припадающе паки благодарим, Твое безмерное и неизреченное милосердие смиренно моляще. Да яко же ныне моления рабов Твоих прияти, и милостивно исполнити сподобил еси, и во предняя в Твоей и искренняго любви и во всех добродетелех преспевающих, Твоя благодеяния всех верных Твоих получити, Церковь Твою Святую, и град сей, и обитель сию от всякаго злаго обстояния избавляя, и мир и безмятежие тем даруя, Тебе со Безначальным Твоим Отцем, и Пресвятым, и Благим, и Животворящим Твоим Духом, во едином существе славимому Богу всегда благодарение приносити и преблагая глаголати и воспети сподобиши.

 

И абие велегласнейше возглашает:

 

Слава Тебе Богу Благодателю нашему во веки веков.

 

Клир же, стоя посреди церкве рек:

 

Аминь.

 

Абие поют Песнь Святаго Амвросия Епископа Медиоланского, сиесть:

 

Тебе Бога хвалим: Тебе Господа исповедуем: Тебе Превечнаго Отца вся земля величает: Тебе вси Ангели, Тебе Небеса, и вся силы: Тебе Херувими и Серафими непрестанными гласы взывают: Свят, Свят, Свят Господь Бог Саваоф, полны суть небеса и земля величества славы Твоея. Тебе преславный Апостольский лик: Тебе пророческое хвалебное число: Тебе хвалит пресветлое Мученическое Воинство. Тебе по всей Вселенней исповедает Святая Церковь, Отца непостижимаго величества: покланяемаго Твоего истиннаго и Единороднаго Сына: и Святаго Утешителя Духа. Ты Царю Славы, Христе: Ты Отца присносущный Сын еси. Ты ко избавлению приемля человека, не возгнушался еси девическаго чрева. Ты, одолев смерти жало, отверзл еси верующим Царство Небесное. Ты одесную Бога седиши, во славе Отчей, Судия приити веришися. Тебе убо просим: помози рабом Твоим, их же честною Кровию откупил еси. Сподоби со Святыми Твоими в вечной славе Твоей царствовати. Спаси люди Твоя, Господи, и благослови достояние Твое, исправи я, и вознеси их во веки: во вся дни благословим Тебе, и восхвалим Имя Твое во век, и во век века. Сподоби, Господи, в день сей без греха сохранитися нам: помилуй нас, Господи, помилуй нас, буди, Господи, милость Твоя на нас, яко же уповахом на Тя. На Тя, Господи, уповахом, да не постыдимся во веки. Аминь.

 

По скончании же сего диакон глаголет:

 

Премудрость.

 

Лик: Честнейшую Херувим, и славнейшую без сравнения Серафим, без истления Бога Слово рождшую, сущую Богородицу Тя величаем.

Слава, и ныне: Господи, помилуй (Трижды).

Благослови.

 

Иерей же творит дневный отпуст. И по отпусте, благословляя люди, глаголет:

 

Благословение Господне на вас, Того благодатию, и щедротами, и человеколюбием, всегда, ныне и присно, и во веки веков.

 

Лик: Аминь.

 

Диакон возглашает многолетие ИХ ИМПЕРАТОРСКИМ ВЫСОЧЕСТВАМ:

 

Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ подаждь, Господи, благоденственное и мирное житие, здравие же и спасение, и во всем благое поспешение: и сохрани Ю на многа лета.

 

Лик: Многая лета (Трижды).

 

Наследнику ЕЯ Благоверному Государю Цесаревичу и ВЕЛИКОМУ КНЯЗЮ ГЕОРГИЮ МИХАЙЛОВИЧУ, и супруге его Благоверной КНЯГИНЕ ВИКТОРИИ РОМАНОВНЕ, и сыну их Благоверному КНЯЗЮ АЛЕКСАНДРУ ГЕОРГИЕВИЧУ многа лета.

 

Лик: Многая лета (Трижды).

 

 

Иерей же осеняет народ Крестом.

 

 

 

Please publish modules in offcanvas position.