Российский
Императорский Дом

Официальный сайт
Династии Романовых

Одноклассники
ВКонтакте

МОЛЕБНОЕ ПЕНИЕ о Российском ИМПЕРАТОРСКОМ Доме, певаемое на Новый Год по Юлианскому календарю(1/14 января)

(Последование молебных пений. – М., 1820. – Л. 1-11об..; Внесенные изменения: поминовение Святейшего Патриарха Московского и всея Руси вместо Святейшего Правительствующего Синода и замена имен Главы и Членов Царственного Дома в соответствии с его нынешним состоянием)

 

 

По окончании Литургии глаголет диакон:

 

Благослови, владыко.

 

Священник: Благословенно Царство Отца, и Сына, и святаго Духа, ныне, и присно, и во веки веков.

 

Лик: Аминь.

 

И чтут: Приидите поклонимся: трижды.

 

И Псалом 64:

Тебе подобает песнь, Боже, в Сионе, и Тебе воздастся молитва во Иерусалиме. Услыши молитву мою, к Тебе всяка плоть приидет. Словеса беззаконник премогоша нас: и нечестия наша Ты очистиши. Блажен, егоже избрал еси и приял, вселится во дворех Твоих: исполнимся во благих дому Твоего, свят храм Твой, дивен в правде. Услыши ны, Боже Спасителю наш, упование всех концей земли, и сущих в мори далече: Уготовляяй горы крепостию Своею, препоясан силою: Смущаяй глубину морскую, шуму волн Его кто постоит, смятутся языцы. И убоятся живущие в концах от знамений Твоих: исходы утра и вечера украсиши. Посетил еси землю, и упоил еси ю, умножил еси обогатити ю: река Божия наполнися вод: уготовал еси пищу им, яко тако (есть) уготование. Бразды ея упой, умножи жита ея, в каплях ея возвеселится возсияющи. Благословиши венец лета благости Твоея, и поля Твоя исполнятся тука: разботеют красная пустыни, и радостию холми препояшутся. Одеяшася овни овчии, и удолия умножат пшеницу: воззовут, ибо воспоют.

 

Слава, и ныне: Аллилуиа (трижды).

 

Посем диакон глаголет следующую ектению:

 

Диакон: Миром Господу помолимся.

Лик: Господи, помилуй.

 

Диакон: О свышнем мире, и о спасении душ наших, Господу помолимся.

Лик: Господи, помилуй.

 

Диакон: О мире всего мира, о благостоянии Святых Божиих Церквей и о соединении всех Господу помолимся.

Лик: Господи, помилуй.

 

Диакон: О святем храме сем (О святей обители сей) и с верою, благоговением и страхом Божиим входящих в онь (в ню) Господу помолимся.

Лик: Господи, помилуй.

 

Диакон: О Великом Господине и отце нашем СВЯТЕЙШЕМ ПАТРИАРХЕ КИРИЛЛЕ, и о Господине нашем (имярек), честнем пресвитерстве, во Христе диаконстве, о всем причте и людех Господу помолимся.

Лик: Господи, помилуй.

 

Диакон: О Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ Господу помолимся.

Лик: Господи, помилуй.

 

Диакон: О Наследнике ЕЯ, Благоверном Государе Цесаревиче и ВЕЛИКОМ КНЯЗЕ ГЕОРГИИ МИХАЙЛОВИЧЕ, и о супруге его Благоверной КНЯГИНЕ ВИКТОРИИ РОМАНОВНЕ, и о сыне их Благоверном КНЯЗЕ АЛЕКСАНДРЕ ГЕОРГИЕВИЧЕ Господу помолимся.

Лик: Господи, помилуй.

 

Диакон: О Богохранимей стране нашей, Властех и Воинстве ея Господу помолимся.

Лик: Господи, помилуй.

 

Диакон: О еже благопоспешити Им во всем, и покорити под нозе их вся христоненавистныя языки и всякаго врага и супостата, Господу помолимся.

Лик: Господи, помилуй.

 

Диакон: О Граде сем, и всяком граде, стране и верою живущих в них Господу помолимся.

Лик: Господи, помилуй.

 

Диакон: О еже милостивно нынешнее благодарение и мольбу нас, недостойных рабов Своих, в пренебесный Свой жертвенник прияти и благоутробно помиловати нас, Господу помолимся.

Лик: Господи, помилуй.

 

Диакон: О еже благоприятным быти молениям нашым, и простити нам и всем людем Своим вся согрешения вольная и невольная, в мимошедшем лете зле нами содеянная, Господу помолимся.

Лик: Господи, помилуй.

 

Диакон: О еже благословити начаток и провождение лета сего, благодатию человеколюбия Своего: времена же мирна, благорастворенны воздухи и безгрешен нам в здравии с довольством живот даровати, Господу помолимся.

Лик: Господи, помилуй.

 

Диакон: О еже отвратити от нас весь гнев Свой, праведно на ны, грех ради наших, движимый, Господу помолимся.

Лик: Господи, помилуй.

 

Диакон: О еже отгнати от нас вся душетленныя страсти и растленныя обычаи: страх же Свой Божественный всадити в сердца наша, ко исполнению заповедей Его, Господу помолимся.

Лик: Господи, помилуй.

 

Диакон: О еже обновити дух правый во утробах наших, и укрепити нас в Православной Вере, и спешных к деланию добрых дел и исполнению всех заповедей Его сотворити, Господу помолимся.

Лик: Господи, помилуй.

 

Диакон: О еже низложити вся ереси и отступства, и насадити всюду правоверие и благочестие, и обратити всех отступлших от правыя веры к познанию Своея истины, и соединити их Святей своей Православной Церкви, Господу помолимся.

Лик: Господи, помилуй.

 

Диакон: О еже избавити Церковь Святую Свою и всех нас от всякия скорби, беды, гнева и нужды, и от всех врагов видимых и невидимых: здравием же, долгоденствием, и миром, и аггел Своих ополчением верных Своих всегда оградити, Господу помолимся.

Лик: Господи, помилуй.

 

Диакон: Заступи, спаси, помилуй и сохрани нас, Боже, Твоею благодатию.

Лик: Господи, помилуй.

 

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

 

Священник возглашает:

Яко подобает Тебе всякая слава, честь и поклонение, Отцу, и Сыну, и Святому Духу, ныне, и присно, и во веки веков.

 

Лик: Аминь.

 

По сем: Бог Господь, и явися нам:

 

И тропари сия: глас 4:

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Слава, глас 3: Твоих благодеяний и даров туне яко раби непотребнии сподоблшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже прещедрый.

И ныне, глас 2: Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире ВЕЛИКУЮ КНЯГИНЮ и град Твой, молитвами Богородицы, и спаси ны.

 

Диакон: Вонмем.

Иерей: Мир всем.

Чтец: И духови твоему.

Диакон: Премудрость вонмем.

Чтец: Прокимен, глас 4. Воспою Господеви, благодеявшему мне, и пою Имени Господа Вышняго.

Стих: Возрадуется сердце мое о спасении Твоем.

 

Посем чтет Апостол к Тимофею, зачало 282:

Чадо Тимофее, молю прежде всех творити молитвы, моления, прошения, благодарения за вся человеки, за Царя, и за вся, иже во власти суть: да тихое и безмолвное житие поживем во всяком благочестии и чистоте. Сие бо добро и приятно пред Спасителем нашим Богом, иже всем человеком хощет спастися и в разум истины приити. Един бо есть Бог, и един ходатай Бога и человеков, Человек Христос Иисус, давый Себе избавление за всех, Емуже честь и слава во веки веков, аминь.

 

Иерей: Мир ти.

Чтец: И духови твоему.

Диакон: Премудрость.

Чтец: Аллилуиа, глас 4.

Таже диакон: И о сподобитися нам слышанию Святаго Евангелия, Господа Бога молим.

Лик: Господи, помилуй (трижды).

Диакон: Премудрость прости, услышим Святаго Евангелия.

Иерей: Мир всем.

Лик: И духови Твоему.

Иерей: От Луки Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

 

И абие иерей чтет Евангелие от Луки, зачало 13:

 

Во время оно, прииде Иисус в Назарет, идеже бе воспитан, и вниде по обычаю Своему в день субботный в сонмище, и воста чести, и даша Ему книгу Исаии пророка, и разгнув книгу, обрете место, идеже бе написано: Дух Господень на Мне, Егоже ради помаза Мя, благовестити нищым посла Мя, исцелити сокрушенныя сердцем, проповедати плененным отпущение и слепым прозрение, отпустити сокрушенныя во отраду, проповедати лето Господне приятно. И согнув книгу, отдав слузе, седе, и всем в сонмищи очи бяху зряще нань: и начат глаголати к ним: яко днесь сбыстся Писание сие во ушию вашею. И вси свидетельствоваху Ему, и дивляхуся о словесех благодати, исходящих из уст Его.

 

Лик: Слава Тебе, Господи, слава Тебе.

 

Абие диакон глаголет ектению сию:

 

Диакон: Рцем вси от всея души и от всего помышления нашего рцем.

Лик: Господи, помилуй (трижды).

 

Диакон: Господи, Вседержителю, Боже отец наших, молимтися, услыши и помилуй.

Лик: Господи, помилуй (трижды).

 

Диакон: Помилуй нас, Боже, по велицей милости Твоей, молимтися, услыши и помилуй.

Лик: Господи, помилуй (трижды).

 

Диакон: Еще молимся о Великом Господине и отце нашем СВЯТЕЙШЕМ ПАТРИАРХЕ КИРИЛЛЕ, и о Господине нашем (имярек), и всей во Христе Братии нашей.

Лик: Господи, помилуй (трижды).

 

Диакон: Еще молимся о Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ.

Лик: Господи, помилуй (трижды).

 

Диакон: Еще молимся о Наследнике ЕЯ Благоверном Государе Цесаревиче и ВЕЛИКОМ КНЯЗЕ ГЕОРГИИ МИХАЙЛОВИЧЕ, и о супруге его Благоверной КНЯГИНЕ ВИКТОРИИ РОМАНОВНЕ, и о сыне их Благоверном КНЯЗЕ АЛЕКСАНДРЕ ГЕОРГИЕВИЧЕ.

Лик: Господи, помилуй (трижды).

 

Диакон: Еще молимся о Богохранимей стране нашей, Властех и Воинстве ея, да тихое и безмолвное житие поживем во всяком благочестии и чистоте.

Лик: Господи, помилуй (трижды).

 

Диакон: Благодаряще со страхом и трепетом, яко раби непотребнии Твоему благоутробию, Спасе и Владыко наш Господи, о Твоих благодеяниих, яже излиял еси изобилно на рабех Твоих, и припадаем, и славословие Тебе яко Богу приносим, и умиленно вопием: избави от всех бед рабы Твоя, и всегда яко Милостив исполни во благих желание всех нас, прилежно молимся Ти, услыши и помилуй.

Лик: Господи, помилуй (трижды).

 

Диакон: О еже благословити венец наступаемого лета благостию Своею, и утолити в нас вся вражды, нестроения и междоусобныя брани: подати же мир, твердую и нелицемерную любовь, благочинное же строение и добродетельное житие, молимтися, Всеблагий Господи, услыши и помилуй.

Лик: Господи, помилуй (трижды).

 

Диакон: О еже не помянути безчисленная беззакония и лукавая наша деяния в мимошедшем лете бывшая, и не воздати нам по делом нашым: но в милости и щедротах помянути нас, молимтися, Милосердный Господи, услыши и помилуй.

Лик: Господи, помилуй (трижды).

 

Диакон: О еже подати дожди благовременны, ранны же и поздны, росу плодоносну, ветры мерны и благорастворенны, и теплоту солнечную возсияти, молимтися, Всещедрый Господи, услыши и помилуй.

Лик: Господи, помилуй (трижды).

 

Диакон: О еже помянути Церковь Святую Свою и укрепити, утвердити же, расширити и умирити Ю, и невредиму адовыми враты, и всеми наветы видимых и невидимых врагов непребориму во веки соблюсти, молимтися, Вседержавный Владыко, услыши и помилуй.

Лик: Господи, помилуй (трижды).

 

Диакон: О еже искоренити и угасити все богохулное нечестие, и царство нечестивых скоро разрушити, и правоверным предати, молимтися, Всесильный Господи, услыши и помилуй.

Лик: Господи, помилуй (трижды).

 

Диакон: О еже избавитися нам в сие грядущее лето и во вся дни живота нашего от глада, губительства, труса, потопа, града, огня, меча, нашествия иноплеменных и междоусобныя рати, и всякия смертоносныя раны, скорби же и нужды, молимтися, Милосерде Господи, услыши и помилуй.

Лик: Господи, помилуй (трижды).

 

Иерей возглас:

Услыши ны, Боже Спасителю наш, упование всех концев земли и сущих в мори далече. И милостив, милостив буди, Владыко, о гресех наших, и помилуй ны: Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне, и присно, и во веки веков.

 

Лик: Аминь.

 

Диакон: Паки и паки, преклонше колена, Господу помолимся.

 

Лик: Господи, помилуй (трижды).

 

Священник же чтет следующую молитву:

Владыко Господи Боже наш, Источниче жизни и безсмертия, всея твари видимыя и невидимыя Содетелю, времена и лета во Своей власти положивый, и управляяй всяческая премудрым и всеблагим Твоим Промыслом. Благодарим о щедротах Твоих, яже удивил еси на нас в мимошедшее время живота нашего, молим Тя, Всещедрый Господи: благослови венец наступающаго лета Твоею благостию: сохрани Возлюбленную Рабу Твою Благочестивейшую Благоверную Государыню ВЕЛИКУЮ КНЯГИНЮ МАРИЮ ВЛАДИМИРОВНУ, Сына и Наследника ЕЯ Благоверного Государя Цесаревича и ВЕЛИКАГО КНЯЗЯ ГЕОРГИЯ МИХАЙЛОВИЧА, супругу его Благоверную КНЯГИНЮ ВИКТОРИЮ РОМАНОВНУ и сына их Благоверного КНЯЗЯ АЛЕКСАНДРА ГЕОРГИЕВИЧА. Умножи дни живота ИХ в непоколебимом здравии, и во всех добродетелех преуспеяние ИМ даруй. Подаждь свыше благая Твоя и всем людем Твоим здравие же и спасение, и во всем благое поспешение. Церковь Твою Святую, град сей и вся грады и страны от всякаго злаго обстояния избави, мир и безмятежие тем даруй: Тебе, Безначальному Отцу со Единородным Твоим Сыном, Всесвятым и Животворящим Твоим Духом во едином существе славимому Богу всегда благодарение приносити и Пресвятое Имя Твое воспевати да сподобиши.

 

Таже возглашает:

Слава Тебе Богу, Благодателю нашему, во веки веков.

 

Лик: Аминь.

 

И абие поет Славословие Великое, сиесть:

Слава в вышних Богу:

Или вместо того песнь Святаго Амвросиа, епископа Медиоланскаго: Тебе, Бога, хвалим:

 

По скончании же сего, диакон: Премудрость.

 

Иерей: Пресвятая Богородице, спаси нас.

 

Лик: Честнейшую Херувим:

 

Иерей: Слава Тебе, Христе Боже, упование наше, слава Тебе.

 

Лик: Слава, и ныне:

Господи, помилуй (трижды). Благослови.

 

Иерей: Иже плотию обрезатися изволивый нашего ради спасения, Христос Истинный Бог наш, молитвами Пречистыя Своея Матере и всех святых помилует и спасет нас, яко Благ и Человеколюбец.

 

 

Диакон возглашает многолетие ИХ ИМПЕРАТОРСКИМ ВЫСОЧЕСТВАМ:

 

Диакон: Благочестивейшей Благоверной Государыне ВЕЛИКОЙ КНЯГИНЕ МАРИИ ВЛАДИМИРОВНЕ всея России подаждь, Господи, благоденственное и мирное житие, здравие же и спасение, и во всем благое поспешение: и сохрани Ю на многа лета.

 

Лик: Многая лета (трижды).

 

Диакон: Наследнику ЕЯ Благоверному Государю Цесаревичу и ВЕЛИКОМУ КНЯЗЮ ГЕОРГИЮ МИХАЙЛОВИЧУ, супруге его Благоверной КНЯГИНЕ ВИКТОРИИ РОМАНОВНЕ и сыну их Благоверному КНЯЗЮ АЛЕКСАНДРУ ГЕОРГИЕВИЧУ многа лета.

 

Лик: Многая лета (трижды).

 

Иерей же осеняет народ Крестом.

 

Please publish modules in offcanvas position.