24 августа/6 сентября. Пренесение честных мощей иже во святых отца нашего Петра Митрополита Киевскаго и всея России Чудотворца.
Тропарь, глас 4: Наста днесь всечестный праздник пренесения честных мощей твоих, Святителю Петре, веселя изрядно твое стадо, и верную ВЕЛИКУЮ КНЯГИНЮ, и люди: о них же не оскудевай моляся Христу Богу, от него дарованней ти пастве сохранитися от враг ненаветованней, и спастися душам нашим.
Кондак, глас 8: Яко врача преизрядна, и источника чудес обильна, днесь сошедшеся любовию духовная твоя чада, в пренесение честных мощей твоих, Архиерею Петре, молим тя: моли Христа Бога даровати честным твоим пренесением Верной ВЕЛИКОЙ КНЯГИНЕ нашей на враги победительная: да твоими к Богу молитвами находящих зол избавляющеся, радостною душею и веселием сердца благодарная ти воспоем, глаголюще: радуйся, отче Петре, Архиереев и всея Российския Земли удобрение.
29 августа/11 сентября. Усекновение честныя главы честнаго славнаго Пророка, Предтечи и Крестителя Господня Иоанна.
Тропарь, глас 2: Память праведнаго с похвалами, тебе же довлеет свидетельство Господне, Предтече: показалбося еси воистинну и пророков честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира, и подающаго нам велию милость.
Кондак, глас 5: Предтечево славное усекновение, смотрение бысть некое Божественное: да и сущим во аде Спасово проповесть пришествие. Да рыдает убо Иродиа, беззаконное убийство испросивши: не Закон бо Божий, ни живый век возлюби, но притворный, привременный.
30 августа/12 сентября. Пренесение честных мощей святаго Благовернаго Великаго Князя Александра Невского. И воспоминание мира, заключеннаго между Империею Российскою и Короною Свейскою.
Тропарь, глас 4: Познай свою братию, российский Иосифе, не в Египте, но на небеси Царствующий, Благоверный Княже Александре, и приими моления их, умножая жита людем плодоносием земли твоея, грады владычествия твоего ограждая молением, Наследником твоим Благоверным ИМПЕРАТОРАМ нашим на сопротивныя споборствуя.
Ин тропарь, глас 8: Благословен еси, Христе Боже наш, иже неведущия ны во брани премудрыя явлей, даровав нам крепость и силу благодати Твоея, избрав мужа по сердцу Твоему, Благовернаго ИМПЕРАТОРА нашего ПЕТРА, и укрепивый мужеством подвизающеесявоинство: имже и сими России мир Твой даровавый, Человеколюбче, слава Тебе.
Кондак: Якоже сродники твои Борис и Глеб явишася тебе с небесе в помощь, подвизающемуся на Велгера свейского и воев его: тако и ты ныне, блаженне Александре, прииди в помощь твоим Сродником, и побори борющия ны.
Ин кондак, глас 8: Укрепивый Давида на Голиафа, укрепил еси и ИМПЕРАТОРА нашего ПЕТРА, в простоте сердца служащаго Ти, и о Имени Твоем подвизающагося, благодеяния Твоя прославляющаго: щедроты Твоя даровал еси ему, Христе Боже: Ты бо надежда наша, и спасение, и непобедимая победа.
8/21 сентября. Рождество Пресвятыя Владычицы нашея Богородицы и Приснодевы Марии.
Тропарь, глас 4: Рождество Твое, Богородице Дево, радость возвести всей Вселенней: из Тебе бо возсия Солнце Правды Христос Бог наш, и разрушив клятву, даде благословение, и упразднив смерть, дарова нам живот вечный.
Кондак, глас 4: Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.
11/24 сентября. Пренесение мощей Преподобных Сергиа и Германа Валаамских Чудотворцев из Нова Града на Валаам.
Тропарь, глас 4: Евангелия Христова истиннии послушницы явистеся, Преподобнии, мир и вся, яже в нем, яко не сущая преобидевше любве ради Христовы, и в морский остров вселистеся, и трудолюбно в нем противу невидимых врагов козней подвизастеся, постом, бдением и всенощным стоянием плоти своя Духу мудре повинули есте. И ныне Пресвятей Троице предстояще, молитеся, всеблаженнии отцы Сергие и Германе, сохранитися в мире Христоименитой ВЕЛИКОЙ КНЯГИНЕ нашей, и спастися душам нашим.
13/26 сентября. Предпразднство Воздвижения.
Тропарь, глас 4: Животворящий Крест Твоея благости, Его же даровал еси нам недостойным,Господи, Тебе приносим в молитву, спаси ВЕЛИКУЮ КНЯГИНЮ, и град Твой молящийся Богородицею, едине Человеколюбче.
14/27 сентября. Воздвижение Честнаго и Животворящаго Креста Господня.
Тропарь, глас 1: Спаси, Господи, люди Твоя, и благослови достояние Твое, победы Благоверной ВЕЛИКОЙ КНЯГИНЕ нашей МАРИИ ВЛАДИМИРОВНЕ на сопротивныя даруя, и Твое сохраняя Крестом Твоим жительство.
Кондак, глас 4: Вознесыйся на Крест волею, тезоименитому Твоему новому жительству щедроты Твоя даруй, Христе Боже, возвесели силою Твоею Благоверную ВЕЛИКУЮ КНЯГИНЮ нашу МАРИЮ ВЛАДИМИРОВНУ, победы дая ЕЙ на супостаты, пособие Имущей Твое оружие мира, непобедимую победу.