31 января/13 февраля. Иже во святых отца нашего Никиты Епископа Новгородскаго.
Кондак, глас 6. Подобен: Еже о нас: Архиерейства саном почтився, и чисте чистейшему предстоя, прилежно моление за люди твоя приносил еси, овогда же и граду запаления угасил еси. И ныне, Святителю Никито, моли Христа Бога спасти Православную ВЕЛИКУЮ КНЯГИНЮ и люди твоя молящияся, да вси вопием ти: радуйся, Святителю, отче предивный.
2/15 февраля. Сретение Господа Бога и Спаса нашего Иисуса Христа.
Тропарь, глас 1: Радуйся, благодатная Богородице Дево, из Тебе бо возсия Солнце Правды Христос Бог наш, просвещаяй сущия во тме: веселися и ты, старче праведный, приемый во объятия Свободителя душ наших, дарующаго нам воскресение.
Кондак, глас 1: Утробу Девичу освятивый Рождеством Твоим, и руце Симеоне благословивый, якоже подобаше, предварив, и ныне спасл еси нас, Христе Боже: но умири во бранех жительство, и укрепи ВЕЛИКУЮ КНЯГИНЮ, Юже возлюбил еси, едине Человеколюбче.
4/17 января. Святаго Благовернаго Великаго Князя Георгиа, от Царя Батыя убиеннаго на реце Сити. И преподобнаго и Богоноснаго отца нашего Кирилла Новоезерскаго.
Кондак Благоверному Великому Князю, глас 8: Христове смерти подобяся, и Того испити чашу возжелев, яко живота, за Негоже мужески подвизався, презрев земное царство, от безбожных варвар пострадав до смерти, Георгие Богомудре: тем моли спастися Христолюбивой ВЕЛИКОЙ КНЯГИНЕ нашей, молитвами твоими.
Кондак преподобному, глас 8: Взбранному и крепкому адаманту, прогонителю бесов, новому чудотворцу, победительная, страстей злых свободившеся, благодарственная восписуем ти, отче наш Кирилле: но яко имея дерзновение у Престола Христова, верою чтущих тя, град же и люди, молитвою твоею сохраняй: ты бо еси ВЕЛИКОЙ КНЯГИНЕ Крестоносной, и стаду твоему похвала и утверждение.