25 декабря/7 января. Еже по плоти Рождество Господа Бога и Спаса нашего Иисуса Христа. И воспоминание избавления Церкви и Державы Российския от нашествия галлов, и с ними двадесяти языков.
Тропарь, глас 4: Рождество Твое, Христе Боже наш, возсия мирови свет разума: в нем бо звездам служащии звездою учахуся Тебе кланятися Солнцу Правды, и Тебе ведети с высоты востока: Господи, слава Тебе.
Кондак, глас 3: Дева днесь Пресущественнаго раждает, и земля вертеп Неприступному приносит, аггели с пастырьми славословят, волсви же со звездою путешествуют: нас бо ради родися Отроча младо, Превечный Бог.
1/14 января. Еже по плоти Обрезание Господа Бога и Спаса нашего Иисуса Христа. И иже во святых отца нашего Василиа Великаго, Архиепископа Кесарии Каппадокийския.
Тропарь, глас 1: На Престоле огнезрачном в Вышних седяй со Отцем Безначальным и Божественным Твоим Духом, благоволил еси родитися на земли от Отроковицы неискусомужныя, Твоея Матере, Иисусе: сего ради и обрезан был еси яко человек осмодневный. Слава всеблагому Твоему совету: слава смотрению Твоему: слава снисхождению Твоему, едине Человеколюбче.
Кондак, глас 3: Всех Господь обрезание терпит, и человеческая прегрешения яко благ обрезует: дает спасение днесь миру. Радуется же в Вышних и Создателев иерарх, и светоносный Божественный таинник Василий.
6/19 января. Святое Богоявление Господа Бога и Спаса нашего Иисуса Христа.
Тропарь, глас 1: Во Иордане крещающуся Тебе, Господи, Тройческое явися поклонение: Родителев бо глас свидетельствоваше Тебе, возлюбленнаго Тя Сына именуя, и Дух в виде голубине, извествоваше словесе утверждение, явлейся, Христе Боже, и мир просвещей, слава Тебе.
Кондак, глас 4: Явился еси днесь Вселенней, и свет Твой, Господи, знаменася на нас, в разуме поющих Тя: пришел еси, и явился еси Свет неприступный.
9/22 января. Иже во святых отца нашего Филиппа Митрополита всея России.
Тропарь, глас 8: Первопрестольников Преемниче, столпе Православия, истины поборниче, новый исповедниче, Святителю Филиппе, положивый душу за паству твою: тем же, яко имея дерзновение ко Христу, моли за ВЕЛИКУЮ КНЯГИНЮ Православную, за град же и люди, чтущия достойно святую память твою.